Bilbao-Bizkaia Nazioarteko Dantza Garaikidearen XXVII. Jaialdia gaur inauguratuko da Sala Rekalden, Carmen Fumero konpainia kanariarraren eskutik.
Abenduaren 15era arte dozena bat hitzordu ikusteko aukera egongo da Rekalde aretoa, Barakaldo Antzokia, Azkuna Zentroa-Alhondiga Bilbao, Guggenheim Bilbao Museoa, Bilboko Arte Ederren Museoa, Bizkaia Aretoa, Multicines, Andoni Aresti Landa eskola eta La Fundición espazioetan. Denetarik izango da: ikuskizunak, zinema, prestakuntza eta dantza komunitarioko proiektu berri bat.
“Dantza munduari begiratzeko, pentsamendua aktibatzeko eta inguratzen gaituenaz jabetzeko modu bat izan daiteke eta izan behar du. Horregatik, aurten ikuskizun sorta bat aurkezten dugu, bizi dugun errealitatearen alderdiak zalantzan jartzeko, galderak egiteko edo galdetzeko”. Hortik etorri da leloa: begiak zabalik dantzatzera.
Diogun moduan, lehen emanaldia gaur arratsaldean ikusi ahal izango da, 19:00etan, Rekalde aretoan. Carmen Fumero konpainia kanariarraren lana den A ojo pieza egingo da. Fumerok berak eta 2019ko Dantza Sari Nazionala jaso zuen Dácil Gonzálezek osatutako duoak egingo du.
Dantzaldiaren hurrengo hitzordua urriaren 3an izango da. La Fundiciónek Magda & Miguel F taldearen Não tenho terra nos sapatos lanaren Estatuko estreinaldia hartuko du. Urriaren 24an, Barakaldo Antzokian, Thomas Noone Dance konpainia katalan-londrestarraren Impostor piezaren Euskadiko estreinaldia izango da.
Azaroaren 5ean, 2015eko Dantza Sari Nazionala den La Intrusak Este himno llevará la palabra euforia ikuskizuna eskainiko du. Azaroaren 12an, Joan Porcelen La carn filmaren aurrestreinaldia izango da. Asteburu horretan bertan, Marco Flores dantzaria (2018ko El Ojo Crítico de Danza saria eta 2020ko Gizonezko Dantza Interpretatzaile Onenaren Max saria) izango da jaialdiko protagonista nagusia Guggenheim Bilbao Museoan Cante, guitarra y baile lanarekin.
Abenduaren 15ean, hiru pieza ikusteko abagunea eskainiko da: Fabian Thomé frantziarrak Nahas aurkeztuko du; Alejandro Moya madrildarrak, Peeping Tom Belgikako konpainia entzutetsuko kideak, Desvelo eskainiko du; eta Federica Porello italiarrak, El demà d’ahir egingo du.
Azkenik, dantza komunitarioko tailer bat, Laberintos: Arquitectura humana en movimiento izenekoa Sonia Shivala, Natxo Montero eta Eva Ruiz de Eguino dantzariek egingo dute, abenduaren 10ean, Bizkaia Aretoan.
Xehetasun guztiak eta informazio gehiago: Dantzaldia.
