Apirilaren 2an, larunbata, HR!Z edo Harrobia Zuzen kontzertu programaren hirugarren zita izango duzue Donostiako Doka Kafe Antzokian. Zuzenean bi talde ariko dira: Split 77 (Bilbo, Rock/Elektronika) eta Fairlight (Donostia, Elektronika/Rock).
Sei urteko isilunea hausteko bueltatu da Split 77 taldea. Denbora izan dute taldearen izen bereko hirugarren diskoa prestatzeko, eta orain kantu berriak aurkezteko itzuli dira. Bilboko laukoteak Antenna eta Mentura diskoekin izandako eboluzioa muturrera eraman du. Elektronikak irentsi du rockaren izaera, eta horrela, proposamen deigarria eratu dute. Batetik, alaia eta dantzagarria. Indie-pop familiakoa. Bestetik, sarkorra eta iluna. Post-punk zaporekoa. Zuzenekoetan eroso sentitzen dira, eta ikusleak, are erosoago.
Beste aldetik, Fairlight proiektua talde bihurtu da, izen propioarekin. Fairlight bandak urteak eman ditu esperimentatzen. Musika elektronikoaren aukerak aztertu dituzte, eta bide batez, kantu interesgarriak sortu. Baina Jon Goya eta Carlos Toro konexioak beste pauso bat egiteko beharra ikusi zuen. Horrela, rock talde baten izaera hartuz laukote bezala ari dira. Donostiako Aste Nagusian Delorean taldearekin batera agertu ziren. Hurbildu ziren askok ezusteko ederra hartu zuten. One Fine Day diskoa aterata, kantu berriak ere osatu dituzte zuzenean eskaintzeko.
