Ira Sachs zuzendari estatubatuarra Tabakalerako udako zinema-programaren protagonista izango da aurten, eta bere ekoizpen zinematografikoaren bederatzi filmek osatuko dute egingo den zikloa, abuztuaren 29ra arte iraungo duena.
Uztailean eta abuztuan, larunbatero, Ira Sachsen unibertso zinematografikoa ezagutzeko aukera egongo da. Sachs “New Queer Cinema mugimenduko ezinbesteko kidea da, 90eko hamarkadan Queer artista, zinemagile eta aktibistek bultzatutako zinema- eta bideo-ekimena erradikalki politikoa eta estetikoki berritzailea izan zen”.
Sachs Donostiara joango da uztailaren 4an, Peter Hujar’s Day (2025) zikloa hasteko aukeratutako filma aurkeztera. 1987an hiesak jota hil zen New Yorkeko argazkilariaren azken orduei buruzko elegia da.
Uztaileko eta abuztuko film-emanaldien ostean, zikloari amaiera emateko, The Delta (1996), Sachsen lehen film luzea proiektatuko da. Protagonistak erruduntasun sentimenduaren ondorioz bera izateko duen ezintasuna erretratatzen du filmak. Sundanceko Zinemaldian estreinatu zen 1997an.
