Endredo eta intriga politikoa ardatz dituen Tartean Teatroaren Kortxoaren Dilema antzezlana egunotan oholtzaratuko da Pabellón 6 aretoan, gaztelaniaz eta euskaraz. Euskarazko emanaldiak irailaren 4an eta 11n izango dira, eta gaztelaniaz irailaren 6,7,12,13, eta14an egingo da.
Obrak “sakontasun handiko konflikto politikoak eta dilema etikoak baliatzen ditu, baina ez da drama bat, baizik eta komedia politikoa. Antzezlan hau endreduzko komedia bihurtzen da trama eroagatik. Ezer ez da hasiera batean ematen duena. Eta politikoa da, kontzeptuaren alderik intimoenean, pertsonaiak amildegiaren ertzean kokatzen dituelako. Bizitza bera joka dezakegu, zenbait printzipio politiko mugaraino onartuz gero. Kortxoaren dilema etika, koherentzia, traizio eta mendekuei buruzko joko teatral bat da. Borroka honetan, bizitza galtzen ez duenak, dignitatea galduko du. Borroka latza eta nahasia izango da, post egia eta fake-en garai ilun honetan, zaila delako bereiztea zer den zinezkoa eta zer faltsua.”
Lanaren korapiloa hauxe duzue: Irakaslea (70 urte) katedratiko jubilatua da, ezkerraren erreferente intelektuala. Pronostiko gaiztoko minbizia dauka, baina sendatzeko aukera sortu da ezustean: aberats ospetsu batek osasun sistema publikoari dohaintzan eman duen erradioterapia ekipamendu batean tratamendua har dezake. Iritzi publikoak goraipatu egin du donazio hau. Bakan batzuk, ordea, zergak behar bezala ez ordaintzeko trikimailua dela salatu dute. Hauen buru, irakasle zaharra. Orain denek galdetzen diote zer egingo duen, bere printzipioekiko leiala izan ala prakak jaitsi. Gaur, bere erabakia publikoki azaldu behar duen unean, Ikasle bat (60 urte) agertuko zaio ezustean. Aspaldiko kontuak garbitzera dator.
Testuaren egilea Patxo Telleria da, Mireia Gabilondok zuzendu du eta Fernando Bernues arduratu da eszenografia-diseinuaz. Patxo Telleria eta Mikel Martinez oholtza gainean izango dira euskarazko bertsioan eta gaztelaniazko bertsioan Patxo Telleria eta Ramón Barea.