Nelson Mandela XX. mendeko bigarren erdia markatu duten pertsonari handienetako bat da, bere helduaroaren erdia (27 urte) kartzelan igaro arren. Apartheid-aren kontrako borrokalari nekagaitza eta Hegoafrika berriaren aita ez ezik, mundu osoarentzat bihurtu da duintasun pertsonalaren eredu, baita politikaren nobleziaren adibide garbiena ere.
1918an jaio zen Mandela, Hegoafrika britainiarren menpe zegoela. Tribuko aristokraziako semea izanda, unibertsitatean ikasteko aukera izan zuen; gaztaro alai eta nahiko axolagabea bizi izan zuen, baina berak eta bere arrazakoek bizi zuten arrazakeriak politikan engaiatzera eraman zuten. ANC (Afrikar Kongresu Nazionala) alderdiko lider karismatikoenetako bat izan zen, baita jazartuenetakoa ere.
Politikaren bake-bideak antzuak zirela-eta, alderdiaren adar armatua sortzea erabaki zuen. Kartzelan eduki zuten 27 urtean, baina bertan zegoela hasi zituen Gobernuarekiko elkarrizketak, apartheid sistema aldatzeko. Hauteskunde libreak egin zirenean, Hegoafrikako lehenengo lehendakari beltza bihurtu zen 1994an. 1999an kargu guztiak utzi zituen.
Maritxu Murua (Donostia, 1942): Historian lizentziatua. Irakaskuntzan jarduna hainbat lekutan, 25 urtez Hondarribiko Talaia institutuan. 2004an hartu zuen erretiroa, eta hauxe du lehenengo liburua, aspaldidaniko grina eta interesari bidea emanez.
"Mandelaren autobiografia irakurri nuen eta hunkitu egin ninduen zinez. Alde batetik, bere gizatasunak ukitu ninduen eta, bestetik, sinesten zituen printzipioen defentsan zeuzkan senak eta ardurak" esan du egileak.
Elkar argitaletxeak bidalita