Nontzeberri

Miren Gaztañagak “Stereo” antzeztuko du Larrabetzuko Hori Bai gaztetxean

Miren Gaztañagak sortu eta zuzendutako lana da Stereo, zeinak dantza eta antzerkia uztartzen dituen. Ostiralean aurkeztuko du lan hori Larrabetzuko Hori Bai gaztetxean, 20:00etatik aurrera.

Stereo maskulinotasunaren eta feminitatearen inguruko gogoetak biltzen ditu. “(Obra) testuinguru pribatua publiko bihurtzen da taula gainean; zalantza eta hausnarketek boza hartzen dute. Ateak zabalik daude, nahi duenak begira dezala”.

Hil honetako bestelako ekitaldiak ere izango dira Hori Baien. Hala, ekainaren 11n, Bertso Truk Bertso Eskolen Arteko Topaketa gaztetxean amaituko da.

Hilaren 17an, umeentzako hip-hop saioa izango da: Beatbox, rap eta bertsolariak. 19an, Ekizak bere bakarkako estreinako lana aurkeztuko du, eta, azkenik, 23an, San Juan gaua ospatuko dute, Bizkargi Dantza Elkartearekin.