Landarte 2024 programaren zortzigarren edizioan, Oibar, Elgorriaga, Oteiza, Arrada eta Untziti herriek Peru Galbete, Ekhiñe Etxeberria, Estefanía de Paz Asín, María Azkarate, Oihane McGuinnessen esku-hartze artistikoak hartuko dituzte urriaren amaierara arte.
Vianako Printzea Erakundeko Kultura Zuzendaritza Nagusiak antolatuta, Landarte ekainean hasi zen, eta sortzaileek prospekzio-lanari ekin zioten, lan egin behar zuten herriekin loturak ezarriz. Irailean, beren proiektuak definitu zituzten, eta egun hauetan bizilagunekin batera garatzen ari dira.
Peru Galbete sortzailea Oibarren dago Piedra a piedra, diario colectivo de Aibar izeneko proiektuarekin. Bertan eguneroko bat planteatzen du, non biztanle bakoitzak data bat aukeratu eta kontatu nahi duen zerbait idazten duen. Data nabarmenak, bizipenak, pasadizoak… herriaren kontakizun kolektiboa eraikitzeko.
Ekhiñe Etxeberria zinemagilea Elgorriagan dago Herriko Ostatua-Herriko bihotza proposamenarekin. Ekhiñek auzo-loturak, Herriko Ostatua, auzolanaren tradizioa, jaiak, errezeta tipikoak, etxeen izenak edo euskararen defentsa landu ditu.
Estefanía de Paz Asín artista multidiziplinarra Oteiza de la Solanan dago La ballena Invisible lanarekin. Lagun ikusezinaren antzeko elkarlan-joko baten bidez, herriko kolektiboen arteko enpatia eta lankidetza sustatzeko helburua du, elkarri laguntzea eta komunitate-loturak sendotzea sustatuz.
María Azkarate argazkilari eta arkitektoa Arradan dago Anecdotario proiektuarekin. Azkaratek komunitate batean dauden loturez jabetzeko lana egin du. Hori lortzeko, anekdotario bat prestatzen ari da, herriko bizilagunen bizipen partikularra bildu eta balioesteko. Gainera, bilerak egiten ari dira anekdotarioari lotutako kartografia bat egiteko.
Azkenik, Oihane Macguiness Armendarizek Airearen kulturaren izkinak eta ibilitakoa kartografiatu proiektua garatu du, Untzitiko haraneko herrietako biztanleen arteko kohesioa lortzeko.