Arriaga Antzokiak eta Bilboko Koral Elkarteak Arriagaren Aterkia ikuskizuna aurkeztuko dute bi emanalditan: urriaren 17an, 18:00etan, eta urriaren 18an, igandean,12:00etan.
Haur eta familientzako musika ikuskizuna Ane Pikazak zuzendu du, eta bertako libretoa Leire Bilbao idazleak egin du. Istorioa Juan Crisostomo de Arriagaren aterki baten aurkikuntzarekin hasten da, oroimenean, denboraren joanean eta bizitzaren etapa ezberdinetan zehar bidaia bat proposatzeko, betiere Bilboko euripean.
Piezan ere, Bilboko Koral Elkarteko ehun bat ahots entzungo dira, bai eta Nerea Alberdik eta Aitor Etxebarriak konposatutako musika ere. Hiru aktore izango dira oholtza gainean: Loli Astoreka, Leire Ucha eta Itziar Manero.
Arriagaren Aterkia obra oso sinbolikoa da. “Juan Crisostomo de Arriagaren musika-ondarea eta Bilboko hiria bera omentzen ditu hiribilduko elementu ikoniko ugari erantsiz: kale bustiak, itsasadarra, baldosak, uholdeak, ontziolak edo zirgariak”.
Arriagaren Aterkia musikalak “bidaia bat proposatzen du memorian, denboraren joanaren eta bizitzaren etapetan zehar, beti Bilboko euripean. Istorioak haurtzaroa, gaztaroa, helduaroa eta zahartzaroa zeharkatzen dituen pertsonaia bati jarraitzen dio, musikak eta oroitzapenek denboren eta emozioen artean bidaiatzeko aukera ematen dioten bitartean. Hala, belaunaldien arteko transmisioaren, irudimenaren eta jarraitutasunaren sinbolo bihurtzen da aterkia”.