Lau asteburutan jokatuko dira Gipuzkoako txapelketako final zortzirenak. Aurrekoan, Gipuzkoako Bertsolari Txapelketako final zortzirenak Andoain eta Azkoitian izan ziren, larunbatean eta igandean, hurrenez hurren.
Iñigo Manzisidor Mantxi handiena izan zen larunbatekoan eta Arkaitz Oiartzabal Xamoa izan zen onena bestean. Mantxik 500 eskuratu zituen larunbatean eta Xamoak aldiz 460,5. Biak izan ziren beraz, lehen kanporaketako garaileak.
Eta asteburu honetan beste bik izango dute zuzenean txartela eskuratzeko aukera. Eibarren, Coliseo antzokian, Iñaki Gurrutxaga, Agin Rezola, Jokin Labayen, Nerea Elustondo, Felix Zubia eta Iker Osa arituko dira. Iñaki Gurrutxagak badaki zer den Gipuzkoako finalean kantatzea eta Agin Rezola izan zen udaberriko fasean puntu gehien lortu zituena. Kepa Isasi arituko da gai jartzen.
Eta Lazkaon, berriz, Unai Muñoa, Nahikari Gabilondo, Beñat Lizaso, Beñat Iguaran, Iban Urdangarin eta Adur Gorostidi arituko dira, Areria kulturgunean, 17:30etan, Irati Arrietak zuzenduta.