FANT jaialdiaren 32. edizioa maiatzaren 8tik 16ra bitartean izango da, eta bere engranajeak mugitzen hasi dira.
Ofizialki hasi baino egun batzuk lehenago, jaialdiak Planotik Kanpo sekzioa estreinatuko du, eta maiatzaren 4tik aurrera askotariko programazioa aurkeztuko du genero fantastikoaren zinemaren inguruan. Ziklo berri hau Nerea Torrijos jantzien diseinatzaile bilbotarraren Zinemako jantziak erakusketarekin hasiko da. “Zenbait pieza originalen bidez, publikoak ikusiko du nola erabiltzen dituen egileak ehunak, testurak eta koloreak zineman munduak eraikitzeko”. Abandoko Udaltegiak haren diseinuen lagin bat hartuko du maiatzaren 4tik 29ra arte. Era berean, maiatzaren 8tik 30era, Batman, gaueko zaindaria erakusketa ikusgai egongo da Begoñako Udaltegiko liburutegian.
Beste aldetik, Cristian Bernard zuzendari argentinarraren Bajo tus pies filmaren aurrestreinaldia ere atal horren barruan egingo da. Eta maiatzaren 7an, 19:00etan, Jaime Novo kazetariak Rowan March: El Consenso thriller distopikoa aurkeztuko du Abandoko Udaltegian. Maiatzaren 9an, 12:30ean, Jack Taylor aktorearen Mis 100 años de cine. Memorias liburuaren aurkezpena egingo da Azkuna Zentroko Bastida aretoan. Hurrengo egunean, maiatzaren 10ean, 12:30ean, Edith del Campo, Kate Lynnon eta Madame Eloise egileen Revelaciones liburuaren aurkezpena egingo da Azkuna Zentroaren espazio berean.
Jaialdian zehar, Fanteskola zikloan 5 eta 12 urte bitarteko haurrei zuzendutako hiru film emango dira: Maya, emaidazu titulu bat, Oink Oink eta Kaixo Frida. Hitzorduak BBK aretoan izango dira, maiatzaren 11tik 14ra, 11:00etan.
Era berean, Jaialdiak 2026ko edizio honetan saritutako pertsonei buruzko xehetasun gehiago ematen jarraitzen du. Aranzazu Callejak Ohorezko FANT saria eta Eugenio Mirak Fantastikoaren Izarra saria jasoko dutela iragarri ondoren, FANTek jakinarazten du Bruno Martín zuzendari, gidoilari, editore eta aktore madrildarrak FANTROBIA saria jasoko duela. Sari horrek genero honetako zinemaren barruko figura berriak saritzen ditu.