Legazpiko Elbereth metal taldeak Azken agurra, azken egurra izeneko kontzertua iragarri du martxoaren 28rako. Kontzertu horren bidez haien ibilbideari bukaera emango dio taldeak. Legazpiko III. Oholtza bete bihotz jaialdi berezian izango da, Koma beteranoekin batera.
Ohar baten bidez taldeak ber agurraren arrazoiak azaldu ditu: “25 urte dira lehen aldiz oholtza gainera igo ginenetik. Bidean hainbat kontzertu, entsegu, kilometro, bizipen eta garagardo elkarbanatu ditugu lagun askorekin.
Mende laurdena ez da urtero betetzen, momentu onak eta ez hain onak bizi izan ditugu. Mugarri asko bete ditugu, noiz edo noiz ametsak zirenak egia bihurtuz. Bost disko argitaratzeko aukera izan dugu, taula gainean inoiz pentsatu ahal ez genituen taldeekin aritzeko aukera izan dugu, eta hainbat lagun berri egiteko aukera izan dugu.
Hau guztia ospatzeko, etxean joko dugu, Oholtza bete bihotz omenaldiaren barruan. Kontzertu oso berezia izango da, Andoni eta Iñurri omenduko ditugulako beste behin ere, eta 25 urteren ondoren, Elberethen azkena izango delako”.
Legazpiarrek iazko urrian kaleratu zuten Omen (Basque Metal Country) bosgarren eta azken disko-liburua.