Basauriko MAZ indie jaialdiak aurtengo edizioaren aurkezpen kontzertua egingo du ostiralean, otsailak 14, Basauriko Social Antzokian, 21:00etan.
Emanaldia berezia izango da, oholtzan hainbat talde bilduko baitira, gustuko dituzten artisten kantuak zuzenean moldatzeko.
Hala, jaialdiaren hirugarren edizioa irekiko duen kontzertuan ondoko taldeak izango dira : PLV Havoc musikari donostiarrak herrikide dituen La Buena Vida bandaren kantuak moldatuko ditu; Zodiacs gipuzkoarrek gauza bera egingo dute the Who klasikoen errepertorioarekin.
Sonic Trash bilbotarrek, halaber, rock klasikoak txikituko dituzte, tartean, Velvet Undergrounden kantuak; El Inquilino Comunista getxotarrek, berriz, 70eko hamarkadan New York hiriko CBGB aretoan bildutako punk-rock eszenako banden kantuak joko dituzte; Mama Beat bilbotarrek, ostera, 80ko urteetako pop elektronikoan murgilduko dira dantzatzeko asmoz, New Order eta Depeche mode taldeen kantuak bertsionatuko dituzte, batik bat, eta, amaitzeko, The Weapons bandak herri-kantuak joko ditu Popular songs lelopean.
Bestalde, Ramon Churruca performer bizkaitarrak Vidas videovigiladas izeneko emanaldia aurkeztuko du, eta DJk ere izango dira giroa berotzen.