Datorren irailaren 25ean, igandea, Gueñesko Eskulturen Parkean aire libreko margolan azkarren lehiaketa egingo da. Sariketak ARENATZarte eta bere ingurumena izena dauka, eta edonork har dezake parte.
Margolari bakoitzak lan bakarra aurkeztu ahal izango du. Lan artistikoak parkean bertan edo Santa María plazako kanpoaldean egin beharko dira. Sariketan bi kategoria egongo dira: haurrena (14 urtera arte) eta helduena.
Lanak egiteko teknika askea izango da, eta edozein material baliatu ahal izango da, hala ere, obra aurkezteko bi baldintza bete beharko dira: euskarria gogorra izatea eta 50 eta 116 cm bitartekoa izatea.
Parte-hartzaileek euren sormena islatzeko erabiliko dituzten euskarri horiek Gueñesko Udaleko Kultura Arloak zigilatuko ditu sariketaren egunean bertan 09:00etatik 11:00etara. Zigilatzerako orduan parte-hartzaile bakoitzari fitxa bat emango zaio, obrarekin batera beteta itzul dezan.
Epaimahaiaren ebazpena eta sariak egunean bertan emango dira, 18:00etan, eta epaimahaia Gueñesko Udaleko Kultur Zinegotzigoak hautatutako kideek osatuko dute.
Helduen kategorian honako sari hauek banatuko dira: Lehenengo saria 1.000 euro; bigarren saria 600 euro eta hirugarren saria 300 euro.
Haurren kategorian, lehenengo saria lau pertsonentzako bidaia Warner-era izango da eta bigarren eta hirugarren sariak eskolarako material-sorta izango dira.
Margolan irabazleekin batera, hautaketa egingo da aurkeztutako gainerako margolanen artean, eta ARENATZarteko kristalezko eraikinean erakutsiko dira irailaren 27tik urriaren 23ra.