Bilboko Dokumentalen eta Film Laburren Nazioarteko Jaialdiak Iván Zulueta euskal zinemagilearen jaiotzaren 80. urteurreneko ospakizunekin bat egingo du, duela gutxi berreskuratu den bere artxiboko materiala pantailan jarriz, A/Z Zulueta inédito izenburupean (ia zortzi ordu).
Dena ikusi ahal izateko, bost saio antolatu dira jaialdiaren 65. edizioa egingo den egunetan (zehazki, azaroaren 15ean, asteazkena). Beste laurak, berriz, jaialdia hasi aurretik, Golem Alhóndiga zinemetan izango dira ikusgai bihar, azaroaren 2an, eta ostiralean, azaroaren 3an. Hala, gaur berton, Las películas de Consuelo y Antonio eta Aloha (131 min.) izeneko piezak ikusgai jarriko dira. Bai eta bigarren saio batean, La celebración de la carne (70 min.) ere.
Bihar, hirugarren saioan, Fugas y escapadas eta Viaje al final de la noche (128 min.) filmak ikusiko dira. Geroago laugarren saioa izango da: Alrededor de Arrebato (55 min.). Arrebato zinema espainiarrean gehien goraipatutako filmetako bat da.
Azkenik, azaroaren 15ean, Apuntes y bocetos (89 min.) pantailaratuko da. Zikloko azken saioak Iván Zuluetaren lana noraino irits zitekeen planteatzen du.
Zinebik Zuluetaren obra ere ospatuko du azaroaren 18an, Arriaga Antzokian, eta lehen aldiz aurkeztuko da Euskadin Plena Pausa, Madrilgo Doré Zineman estreinatu zen gipuzkoar zinemagilearen film-artxiboaren zati bat musikalizatzeko proiektua. Bertan, los Planetas taldea izango da.
