Holandako The Tibbs bandak northern soul eta funk estiloak jorratzen ditu, eta igandean, hilak 21, Eibarko Portalea aretoan izango da, 19:30etik aurrera.
Gaztelupeko Hotsak diskoetxeak jakinarazi duenez, sei musikarik eta Elsa “frontwoman”-ak osatzen dute The Tibbs banda, zeinak northern soul estilko giro dotoreak eta funk erritmo dantzagarriak jorratzen dituen.
“1960ko eta 1970eko urteetako musika beltzetik edanda, hammond teklatua eta haize musika tresnak ditu ardatz taldeak, soinu sendo bezain azkarra eskaintzeko. (…) Inolaz ere Europako retro Soul esparruko talde onenetakoa da The Tibbs”. Holandarrek, gainera, ska eta rocksteady kutsuko erritmo tropikalak ere jotzen ditu, rockari bizkarrik eman gabe.
Aurten, iraupen luzeko diskoa argitaratu dute holandarrek, Takin’ Over (Record Kicks), zeinak hamaika kantu dantzagarri biltzen dituen. Horretaz gainera, single bat ere plazaratu dute, Lies kantuaren bi bertsio biltzen dituena, hori ere Record Kicks markapean.
