Urtarrilean abiatu ziren Bilboko Kafe Antzokian Euskaltzaletasuna eta feminismoa: zer ikasi, hura elikatu izeneko topaketak. Gaur, maiatzaren 27a, ekimenaren azken saioa izango da.
Hileroko azken astelehenetan aritu dira solasaldian Idurre Eskisabel Larrañaga, Lorea Agirre Dorronsoro, Saioa Iraola Urkiola, Jaime Altuna Ramirez, Aizpea Otaegi Mitxelena, Itziar Gandarias Goikoetxea eta Amelia Barquin Lopez.
Honela aurkeztu dute aipaturiko topaketa: “Hizkuntza eta generoa gurutzatzen direla badakigu, hizkuntza hautuak igarotzen direla genero eraikuntzatik eta alderantziz; prestigioaren, pribilegioen eta eskubideen banaketak osatzen duen sareak jendarteko botere harremanetan gurutzatzen direla. Euskara eta generoa ere ez doaz aparte, eta, horrenbestez, biak, euskara eta generoa, menderakuntzaren alaba izaki, ahalduntzeko eta boteretzeko prozesu berean txirikordatzen diren bi bide dira. Euskaltzaletasuna eta feminismoa dira ahalduntzearen bi alabak.
Bi izate, praktika eta prozesu horiek non gurutzatzen diren, ze ezaugarri partekatzen dituzten, batak bestetik zer ikas lezakeen eta bien arteko aliantzak ze esparru emankor zabaltzen digun mahai gainean jartzea da Euskaltzaletasuna eta feminismoa: zer ikasi, hura elikatu ikastaroaren helburua”.
Diogun bezala, gaur, 19:00etan, Amelia Barquinek Euskara ez-sexitarako bidea izeneko hitzaldia egingo du. Horren ostean, Beatriz Egizabal (antzerkilari eta ipuin kontalaria) eta Ane Labaka (bertsolaria) bertsotan/berritsuketan arituko dira Erradikalak ginen izeneko lanarekin. Bi partaideen letra hauetan azaltzen da zertan den ikuskizuna: “Erradikalak zarete” erraten digute. Eta “nahi eta behar baino gutiago” pentsatzen dugu. Bi emakume elkartu gara eta maletak kontraesanez beteta dakartzagu, bertso eta bakarrizketa formatuan. Erraietatik ariko gara, umorez, erroetara ailegatu nahian.
