Anjel Lertxundiren Otto Pette lan bikainak bere lehen 25 urteak bete ditu, eta urteurrena ospatzeko, Bilbo Zaharra Euskaltegiaren Forumean obra horren gaineko hitzaldiak antolatu ditu otsailean. Anjel Lertxundi idazle oriotarrak idatzitako eleberria da, 1994an, eta Alberdania argitaletxeak argitaratua.
Erdi Aroan kokatua dagoen istorio korapilatsu bat kontatzen da pertsonaia askoren perspektiba erabiliz. Egileak hizkuntza jaso eta aberatsa darabil. Maria Jose Olaziregi literatur adituaren arabera, lan honek “euskal literatura astindu egin zuen”. Espainiako Narratiba Sari Nazionalaren finalista izan zen. Hogei eta bost urte ondoren, 2018an, Alberdania argitaletxearen eskutik Otto Petteren argitalpen gaurkotua kaleratu da.
Bilbo Zaharra Euskaltegiaren Forumeko jardunaldietan, otsailaren 12an, 19:00etan, Bernardo Atxaga eta Jose Kruz Gurrutxaga bilduko dira Hitzaldia euskal literatura zaharrari buruz Martuteneko kartzelan izenekoa egiteko.
Otsailaren 13an, 19:00etan, eta Otto Pette, 25 Urte atalari hasiera emateko, Itxaro Bordak Hiru emazte, gizon mundu batean saioa eskainiko du. Itxaro Borda Historian lizentziatua da Paueko unibertsitatean, eta Maiatz literatur aldizkariaren sortzaileetakoa. Lehen liburua 1984an argitaratu zuen. 2002an, Euskadi saria eskuratu zuen %100 Basque lanari esker.
Bere ostean, Juan Garziak Otto Pette: irudimen orojalea hitzaldia eskainiko du. Bereak dira Akaso (1987) eta Itzalen itzal (1993) ipuin liburuak eta Fadoa Coimbran eleberria (1995). Itzulpen lan asko ditu eginak.
Azkenik, otsailaren 14an, 19:00etan, Juanjo Olasagarre idazleak Otto Pette Trumpen garaietan izeneko saioa eskainiko du; eta horren ostean, Danele Sarriugarte arituko da Otto Pette, tresna-kutxa hitzaldiarekin.
