Barakaldoko Porco Bravo rock bandak La Piara izenburuko lan berria aurkeztuko du bihar, larunbata, Donostiako Doka antzokian, El Quinto Con Tenedor taldearekin batera. Aretoko ateak 20:00etan irekiko dira.
Zuzeneko piztiak dira Porco Bravo, baina estudioan ere ondo moldatzen dira. Hala, disko berria Mungiako MuxikOn eta Aulestiko Altxatune estudioetan grabatu dute, 2015eko urria eta azaroa bitarte. Grabazioa Ryan Smithek masterizatu du New York hiriko Sterling Studios-en. Ekoizle lanetan, berriz, Asier Dominguez eta Txortx Etxebarrieta aritu dira, Jose Alberto Batizen laguntzarekin.
Estudioan, gainera, zenbait kolaborazio izan dituzte: Isma, La Llamada doinuan; Boni Pídelo otra vez kantuan; Txetxu Brindaremos juntos abestian, eta, azkenik, Batiz Solo quiero bailar-en.
Porco Bravo hauexek osatzen dute: Manu Gallego (ahotsa), Txelu Porco (baxua), Oskar puro D´Oliva, Montilla (bateria), Pulpo Bravo (guitarra) eta Asier Indomable (gitarra).
Gaur, bestalde, Enkore eta Burun Danga taldeek joko dute, 20:00etatik aurrera.
