Susa argitaletxeak Munduko Poesia Kaiera sailaren sorta berri bat iragarri du. Koaderno poetiko horiek, hain zuzen, urriaren hastapenean aurkeztuko ditu Susak, eta hauexek izango dira itzulitako idazleak: Ingeborg Bachmann austriarra, Eugenio Montale italiarra eta Jorge de Sena portugaldarra.
Ingeborg Bachmann poetaren kaiera Nagore Tolosak itzuli du, Eugenio Montalerena Anjel Lertxundik eta azkenik, Jorge de Senarena Rikardo Arregik.
“Kanpoko poesia behinena euskarara ekartzea du xede bildumak, edizio xume baina irakurgarrien bidez. Urtero sei ale berri argitaratuko dira, hiru udaberrian eta hiru udazkenean, munduko lurralde, hizkuntza eta literatur tradizio ugarienak aintzat hartzeko asmoz”, dio Beñat Sarasola edizioaren arduradunak.
Horretaz gainera, Susak narratibaren arloan plazaratuko dituen udazkeneko nobedadeak ere iragarri ditu: Gotzon Barandiaran Gidariaren okerra nobela eta hiru narrazio-liburu, Bea Salaberriren Baionak ez daki eta Andoni Urzelairen eta Harkaitz Canoren narrazioak. Azken bi horien liburuek oraindik ez dute izenbururik.
