2015eko Argazkilaritza Sari Nazionalaren irabazleak, Juan Manuel Castro Prietok, memoriaren berreraikuntzaren gaineko gogoeta egin du Cespedosa izeneko erakusketan. Donostiako Kutxa Aretoan ikusgai izango dira bere argazkiak uztailera bitartean.
Proiektu hau leku jakin bati ateratako argazki sorta hutsa baino gehiago da: “bizitoki ditugun lekuekiko identitatearen gainean gogoeta egiteko aukera” bat ere bada.
Kasu honetan, Cespedosa de Tormes da abiapuntua, eta horrexegatik oso proiektu pertsonala da. “Haren haurtzaroaren, lehen oroitzapenen, gaztaroaren eta maitasunaren agertoki izan da, eta egilea behin eta berriz itzultzen da hara, eta bertan igarotzen ditu denboraldi luzeak”.
Sei ataletan banatutako 184 argazkiren eta 2 bideo osagarriren bidez, Castro Prietok Cespedosa bat aurkezten du, “ohiko dokumentalismotik harago doana eta egilearentzat leku magiko gisa jarduten duena, bertan askatu egiten baititu bere ametsak eta sormenezko irrikak”.
Juan Manuel Castro Prieto (Madril, 1958) modu autodidaktan hasi zen argazkilaritzan. 1990ean, Cuscora (Peru) bidaiatu zuen. Bidaia horien emaitza izan zen Perú, viaje al sol (Peru, bidaia eguzkira) lana, PHotoEspaña (PHE) jaialdiaren 2001eko edizioan arrakasta itzela lortu zuena . Hainbat sari ere jaso ditu, hala nola César Vallejo saria (Peru, 2001), Bartolomé Ros saria (PHE, 2002) eta Madrilgo Erkidegoko Argazkilaritzako saria (2003). 2015. urtean, Argazkilaritza Sari Nazionala jaso zuen.
Bere obraz honakoa esan dute adituek: “Haren irudietan beti izaten da misterioa, ezinegona eta edertasuna. Argazkien atzean sinbologia sotil bat ezkutatzen da, irudiak zuzenean lotzen dituena artistaren iruditerian behin eta berriz agertzen diren gaiekin, jaiotzarekin, heriotzarekin, memoriarekin, sexuarekin eta erlijioarekin, besteak beste”.