Galaxie 500 taldean aritutako Dean Wareham gitarra eta abeslariak gidatutako egitasmoa da Luna. 1991an eratua, taldea isilik izan da tarte luzez. Aurten, baina, bi disko berrirekin bueltatu da: bertsioekin osaturiko A Sentimental Education LPa eta sei kantu berri biltzen dituen sei EPa, A Place Of Greater Safety. Lunaren proposamena pop gozoa da, atmosfera psikodelikoekin bildua, dream pop ere deitua.
Bada, Donostiako Kursaalean izango da gaur Luna, 20:00etatik aurrera, eta estatubatuarrekin batera Ramirez Exposure eta Oso Fan arituko dira. Urriaren 13an, halaber, Bilboko Kafe antzokian joko du AEBetako indie-pop taldeak.
Galaxie 500 1987an eratu zen eta 1991an desagertu. Tarte horretan hiru disko argitaratu zituen, Today (1988), On Fire (1989) eta This Is Our Music (1990). Velvet Underground taldetik edaten zuten hiru lan lisergiko dira, rock alternatiboaren zaleen artean sekulako harrera izan zutenak, taldea kultuzko bihurtu arte.
Behin taldea deseginda, Dean Wareham gitarra eta abeslariak Luna eratu zuen, eta proiektu berri horrek ibilbide arrakastatsua egin zuen. 1992an, Lunapark plazaratu zuen, eta 2004ra bitarte, beste zazpi lan gehiago kaleratu zituen, azkena Rendezvous (2004). Harrezkeroztik taldea ezereztu egin zen, baina aurten itzuli egin da indie-pop zaleen zorionerako.
