Otsailaren 28tik martxoaren 28ra bitartean, Laburbira zirkuitua ibilki izango da Euskal Herriko hainbat herritan (29 herri bisitatuko ditu) euskarazko film laburrak erakusten. Laburbirak 15. edizioa beteko du aurten.
Joan den urtean jasotako proposamen guztien artean, 8 film labur aukeratu dira XV. Laburbiran zabaltzeko. “Bat izan ezik, beste guztiak 2017koak dira eta zortzi filmen artean 77 minutuko proiekzio entretenigarria osotu da publikoari eskaintzeko”.
Laburbiraren proposamenak hauexek dira: Ilunpetan (Koldo Carranza), Night Shift (Izaskun Arandia), Higadurak (Oihane Zunzunegi eta Amaia Otaola), Ejecutor (Javi Arriaga), Tazan (UDA films), Areka (Atxur animazio taldea), Kreba (Oier Fuentes) eta Zulo (Erika Olaizola eta Amancay Gaztañaga).
Diogun bezala bihar abiatuko da ekimena Bergara, Ordizia, Azpeitia eta Lazkao herrietan. Martxoko lehen saioa Sestaon eta Ermuan izango da.
Pelikulen gaineko informazioa , eta herri guztien zerrenda, Topagunearen webgunean eskuratu ahal dituzue.
