Koldo Almandozek Sîpo Phantasma (Untzi Phantasma) bere lehendabiziko pelikula luzea estreinatuko du Rotterdamgo IFFR zine jaialdian. Estreinaldia otsailaren 2an izango da, zine garaikide eta berritzaileena sustatzen duen sail ofizialeko Deep Focus programako Regained sailean.
Kruzero bateko gorabeherak eta zine istorioak biltzen ditu filmak. Zuzendariaren esanetan, “kruzero batean itsasoratuko gara, itsasontzi, hondoratze, zinema, fantasma, amodio eta banpiro istorio batean murgiltzeko”.
Sîpo Phantasma, hainbat ahots eta kontakizunen inguruan ardazten da: telegramak, albisteak, liburu pasarteak… Era berean, narrazioen eta irudien erabilpen-eskubideei buruzko gogoeta da. Filma, gainera, mamu klasikoen espiritu itzaltsuarekin estalia dator, tartean, Florence Balcombe, Bram Stoker, Oscar Wilde eta Murnau.
Almandozekin aspalditik lan egiten duen Marian Fernandez Pascalek ekoitzi du lana. Filmaketan, halaber, zuzendariaren ohiko beste kolaboratzaile batzuk ere aritu dira: Laurent Dufreche muntatzailea, Javier Agirre Erauso kamera eta Haimar Olaskoaga soinu-teknikaria. Musika, berriz, Joserra Senperena eta Ignacio Bilbaok (Rumano Power) idatzi dute.
Azkenik, Maider Intxauspek Florence Balcombe pertsonaiaren azalean sartu da, eta Itsaso Azkarate eta Karlos Odriozola txotxongiloek garai victoriarrak girotu dituzte.
