Urriaren 19an hasi zen Ida Lupino zinegile estatubatuarrari buruzko zikloa Donostiako Antzoki Zaharrean, IV. Jardunaldiak Emakumeek Egindako Zinemaz programaren baitan.
Lupinok 1949tik 1953ra zuzendutako hiru film bildu dira programan: Not Wanted, Outrage eta The Young Lovers / Never Fear. Gaur, hain zuzen, The Young Lovers / Never Fear pantailaratuko da Antzoki Zaharrean, 19:00etatik aurrera.
Young Lovers / Never Fear pelikularen zuzendari ez ezik, filmaren gidoilari ere izan zen Lupino, Collier Young-ekin batera. Filmak ezkondu berri den dantzari baten istorioa kontatzen du: Etorkizun handiko dantzariaren bizitza irauli egingo da, gaixotasun larri bat duela jakiterakoan. Lupino estreinakoz agertu zen zuzendari gisa film honen kredituetan.
Lupino aitzindaria izan zen emakume-zinegileen artean, eta emakumeei lotutako hainbat gai jorratu zituen. Aktore, zuzendari, gidoilari eta ekoizle, bere lana oso laudatua izan da. Hauxe esan zuen Martin Scorsesek bere filmen inguruan: “Modu argi eta garbian, ia dokumentalen eran, oso gai arriskutsuak tratatzen ditu, benetako ganbara musikako zatiak bailiran”.
Donostia Kultura