Oskar Benas (Barakaldo 1975) ibilbide luzeko musikaria da, besteak beste, Fermin Muguruza, Maika Makovski eta Cabezafuego musikariekin jo ditu sei sokak. Gitarra-jotzaile trebea, artista grafikoa ere bada. Horretaz gainera, hainbat dokumental eta film laburren soinu-bandak ere idatzi ditu. Bada, oraintsu, Obic izeburuko lan instrumentala plazaratu du.
Belauntzako Agosto estudioetan grabatu du lan instrumental berri hau Benasek. Lan eklektikoa da, askotariko oihartzunak biltzen baititu: surf, western, rock’n’roll zaharra edo exotica. “Reverb askoko rock’n’roll exotikoa da, surf, blues eta psikodelia kutsukoa”. Lan “lisergikoa eta paganoa” ere bada, Lau Sheduk bidalitako oharrean irakurtzen denez.
Diskoa hirukote formatuan grabatu du Barakaldoko musikariak, Daf Linares (baxua) eta Javi Nervioso (bateria eta perkusioak) musikarien laguntzarekin, hain zuzen.
Hemen entzun dezakezue: oskarbenas.bandcamp.com.
