In Memoriam atalaren baitan, Donostiako Kresala zineklubak oraintsu hildako Debbie Reynolds eta Carrie Fisher ama eta alaba aktoreak omenduko ditu. Fisher-ek, hain justu, gaur Trueba aretoetan pantailaratuko den Postcards from the Edge (Mike Nichols, 1990) filmaren gidoia idatzi zuen.
Postcards from the Edge filma Carrie Fisher-en eleberri autobiografikoan oinarritzen da. Testuan amarekin izandako harremana jorratzen da. Pelikulan, Meryl Streep eta Shirley MacLaine aktoreak sartzen dira alaba eta amaren azalean, hurrenez hurren. Zine-aditu Idoia Lainezek aurkeztuko du gaurko emanaldia. Kresalaren arabera, “pelikulak Hollywood-eko ezkutuko kontuak miatzen ditu”.
Filmak Suzanne Vale aktorearen istorioa kontatzen du. Desintoxikazio-klinikatik atera berri da Suzanne, eta filmak egiten jarraitu nahi du; halere, estudioetako arduradunek eta ekoizleek baldintza bat jarriko diote: zinea egiten jarraitu nahi badu, amarekin bizi beharko da, bere bizitza hobeto goberna dezan. Ama, bestalde, aktore zahar alkoholikoa da.
Informazio gehiago: kresalazinekluba.com.
