Bilboko barrutietako Udaltegietan eskaintzen den aldi baterako erakusketa zikloa proposamen berriekin dator.
Argazki eta margolanez osatzen diren lanak, ohikoak diren San Inazio-Ibarrekolanda, Otxarkoaga, Begoña, San Frantzisko, Castaños, Errekalde, Abando eta Zazpikaletako udaltegietan egongo dira ikusgai irailetik urtarrilera bitarte.
Ziklo honen helburua Artea hiribilduko barruti guztietara eramatea eta hainbat artisten lana ezagutaraztea da. Hala, ziklo berri honetan zehar Lea Tirallová eslovaquiarra, Manu Gonzalez Vidal, Iñaki Bengoetxe Jaio, Arantze Arzua, , Juan Carlos Perez Usandizaga, Jose Alberto Eguiluz, Marta Clavero Reyes , Itxaso Manzano eta Marga del Rey-ren lan kolektiboa, Bilboargazki 2018 edizioko zenbait artista amateurren lanak, eta Ongi etorri Errefuxiatuak Plataformak proposatutako lanak egongo dira ikusgai.
Lea Tirallovák artista eslovaquiarrak “Zážitky” (Bizipenak) , izenburuaz bataiatu duen argazki erakusketa, gaurtik hasita irailaren 29ra ikusi daiteke Zazpi Kaletako Burtsan (Pelota 10). Honek irudiak ulertzeko modua ikertzen du, ikuslea interpelatzen du berehalako interpretazio emozionalean. “Kolorearen erabilerak —eta kolorerik ezak— irakurketa bat ezartzen du, intuizioan eta beroaren eta hotzaren arteko — etxekoaren eta arrotzaren arteko— pertzepzioan oinarritua. Alderdi emotiboa orekatu egiten da gizaki bakoitzaren esperientziak eta bizipenek esanahi bat sortzen dutenean”, azaltzen du artistak.
Hilabete honetan zehar proposatzen den beste aukera bat, Ongi Etorri Plataformak proposatzen duen argazki erakusketa da. Migranteen eta Errefuxiatuen egoera Europan erakusketak, nahitaez lekuz aldatzera edo emigrazioaren ziurgabetasunera bultzatutako pertsonen errealitatea hurbildu nahi dio herritarrari. “Gatazka armatuak; pobrezia; pentsaeragatik, erlijioagatik edo sexu-joeragatik eginiko jazarpena; erregimen autoritarioak; horretatik guztitik egiten dute ihes pertsona horiek. Zoritxarrez gutxi dira beren helburura heltzen direnak, eta are gutxiago, bizitza berri bati ekiteko ezinbestekoak diren harrera eta sustraitzea aurkitzen dituztenak” adierazten du plataformak.
Gaurkotasun handia duen argazki erakusketa hau, irailaren 14ra arte Abandoko Udaltegian (Elcano 20) dago ikusgai. Eta irailaren 18tik 28ra arte, San Inazio-Ibarrekolandako Udaltegian (Errekondo 2) egongo da.
Erakusketa bakoitzaren egun zehatzak, barrutietako programazioa jasotzen duen Kultura Barrutik webgunean kontsulta daitezke.
