Amorebieta-Etxanok beste urte batez antolatu du Enrike Renteria pintura lehiaketa. Aurten XXI. edizioa egingo da. Lehiaketa Zornotza Arte eta Kultura Elkarteak antolatu du, Ametx kulturaren udal-erakundeak lagunduta, eta igandean izango da, uztailaren 8an.
Lehiaketak bi modalitate ditu: aire zabaleko pintura-lehiaketa tradizionala eta Zintzilik lehiaketa, herriko balkoietan ikusgai jartzen den obra onena saritzeko.
Aire zabalekoa lehiaketaren bidez, “artistek herriko hainbat txoko pintatuko dituzte, bertatik pasatzen direnen eta ikusmiratzaileen begien bistan”. Lehiakide bakoitzak obra bakarra aurkeztu ahal izango du, eta teknika eta neurriak libreak izango dira. Epaia igandean jakinaraziko da, 18:00etan, Zelaieta Zentroan.
Guztira zazpi obra sarituko dira: lehen saria 500 eurokoa izango da; bigarrena 400 eurokoa; hirugarrena 350 eurokoa; eta laugarrena, bosgarrena eta seigarrena 300 eurokoak. Horrez gain, 200 euroko accesit bat egongo da saririk jaso ez duen herriko obra onenarentzat.
Horrez gain, igandean, 18:00etan, Zintzilik arte-lehiaketaren epaia ere jakinaraziko da. Lehiaketa horretan herriko balkoietan ikusgai jartzen diren obra onenak saritzen dira.
Lau sari banatuko dira parte-hartzaileen artean: lehen saria 400 eurokoa izango da, bigarrena 300 eurokoa, hirugarrena 200 eurokoa eta tokiko beste sari bat egongo da, 200 eurokoa.
