Gipuzkoan bat-bateko zein idatzizko laugarren eta azken kanporaketa izango da datorren ostiralean, maiatzak 27, Lazkaoko San Benito ikastolan eta Areria zineman. Gipuzkoako finala ekainaren 3an izango da, Azpeitiako Izarraitz pilotalekuan, 16:00etan.
Bizkaiko bat-batekoen finala ekainaren 3an egingo da, ostirala, Bilboko Indautxuko El Carmen aretoan, 11:00etan.
Ipar Euskal Herrian ere aste honetan izango dira finalak. Ostiralean, maiatzak 27, Bertsulari Ttiki Eguna egingo dute Izpuran.
Nafarroari dagokionez ostiralean izango da 14-18 urte artekoen saioa eta 14 urte artekoena ekainaren 4an izango da Larraitzarren, Bertso Eskolen egunaren baitan.
Maiatzaren 28an, Legution ospatuko da aurtengo Arabako eskolarteko bertsolari txapelketako finala. Ekitaldiaren hasiera 11:30ean izango da eta geroago, 12:00etan Bat-bateko txikien finala izango da: Gasteiz, Araia-Zalduondo eta Aramaioko gaztetxoekin.
Geroago, 13:30ean txikien sari banaketa izango da, eta bazkariaren ostean, 17:00etan, handien finala, Paula Amilburu, Josu Campo, Amaia Lasaga , Maria Izaga, Elyem Chej eta Ainhoa Comas bertsolarien jardunarekin. Horren ostean, 18:00etan, sari banaketa egingo dute.
Arabatik atera gabe, aipatu behar da, ostiral honetan Menorkako glosadoreak egongo direla Gasteizko Gaztetxean, 21:00etan, Bertso-Glosa saio bat burutzeko asmoz. Bertsolariak Iñaki Viñaspre, Ander Solozabal, Ekaitz Samaniego eta Manex Agirre izango dira eta glosadoreak, Esteve Barceló Verderol, Joan Moll Joanet eta Isamael Moll Pele).