Aberemua erakusketa berria inauguratu du Aitor Ruiz de Eginok, Biarritzeko Anne Broitman galerian. Bertan, aluminiozko 18 eskultura eta aluminioan margotutako 20 lan bildu ditu, maiatzaren 26ra bitartean.
Artistak berak testu labur hau bidali digu bere obraren azalpen gisan: “Zikuzulo gure tailerra, Hernaniko Zikuñaga langile auzoan, Adarra mendiaren magalean, eta industria gune batean kokatua dago. Txikitatik Adarra mendi eta inguruko natur eremuak harridura, misterioa sor arazi didate. Denboraren poderioz hango forma, zuhaitzak, harriak, lanbroak, abereak, hegaztiak kosmogonia pertsonal bat sortzen lagundu didate.
Aberemua (aberea + eremua) erakusketa honetan ikus daitezkeen eskultura eta pintura guztietan Adarra eremuan bizi diren abereen errepresentazio pertsonalak agertzen dira. Estetika pertsonal hori adierazteko aluminioa erabiltzen dut gehien bat, bai eskulturan bai margoan. Metal argitsua, arina, aereoa, leuna, beroa iruditzen zait. Oso ondo egokitzen dena adierazi nahi dudanari. Zikuzulon nere munduko pertsonaiak prozesu industrialekin uztartzen ditut bizia har dezaten.”
