Ostiral honetan, Habanako Gaukarian izenburupean, Joseba Sarrionandia Bilboko Otxarkoaga auzora hurbilduko da, gaur egungo Kuban izandako bizipenak eta gogoetak partekatzera. Saioa 18:30ean izango da bertako Auzo Etxean.
Gai horren inguruan idazleak Airea ez da debalde (Habanako gaukaria) izeneko lana plazaratu zuen Pamiela argitaletxearekin.
“Ez zekiela –zioen Bizitzea ez al da oso arriskutsua? liburuaren sarreran autoreak– irakurtzeak askeago egiten gaituen ala gure arazoez kontzienteago bakarrik. Egunerokotasunez eratutako saiakera literarioaren ubera hari jarraitzen dio Airea ez da debalde horrek ere. Kronika asko daude Habanakoak, hiriak 500 urte betetzen dituen urtean senitartekorik zaharrena balitz bezala: lekua, gauden lekua izateaz gainera, garen lekua da. Indigena, beltz, nazio baztertuko, diru gutxiko, emakume edo errebelde izatearen zoritxarrez eta dohainez arituko gara. Noizean behin, telebistan bizi nahi ez duen eta kosmonauta izan nahi lukeen ume bat pasatuko da. Bizitzaren eta aniztasunaren aldeko erresistentzian, pertsonaia biziekin batera, mamuak ari dira: Eguzkia errona edatera gonbidatu eta goizaldetik zain dagoen Enriquito, Anaïs Ninekin besotik helduta Vedadoko 11 kalean barrena ibiliko den Bartolome Santa Teresa edo Carel Fabritiusen kardantxiloa. Lezio batzuk ere izango dira, konfusioan. Esate baterako, Onelio Jorgeren eskutik ikasiko dugu bizitzan bi gose daudela, ogiarena eta koral zaldiarena. Errealitateagatik ez ezik, imajinazioagatik ere bizi garela.”
