Azkuna Zentroak bultzaturiko Babestu. Sorkuntza garaikideari laguntzeko programa bereziak oso harrera ona izan du artista eta kolektiboen artean, eta ehunka proiektu jaso ditu. Deialdi horrek sorkuntza sustatu nahi du, “tokiko testuinguruko artistek eta kultura-eragileek Covid-19aren krisiak eragin ahal izan dituen prozesuak eta ikerketak garatzen jarrai dezaten”.
Babestu programaren bidez, Azkuna Zentroak “sorkuntza eta kultura garaikidearen laguntza eta hedapena sustatu nahi ditu, esperientzien, ideien eta ikuspegien trukea bultzatuz, eta hurbileko sorkuntza-sarea bultzatu nahi du, diziplina eta zeharkako dimentsioetan”. Gainera, deialdiak artisten zerbitzurako tresna izan nahi du, “Azkuna Zentroaren programazioari eta ekintza-lerroei lotutako sormen-proiektuak garatzeko, eta herritarrei gogoeta artistiko garaikidera hurbiltzeko eta eztabaidak sortzeko”.
Jasotako proposamen guztien artean, hamar proiektuk Azkuna Zentroaren euskarriaz, aholkularitzaz eta bitartekaritzaz gain, 6.000 euro jasoko dituzte. Proiektu irabazleak irailaren 9tik aurrera jakinaraziko dira.
Aukeratuko diren horiek praktika artistikoei heltzeko modu berriak esploratu beharko dituzte, eta gainera, entitatearen programazio-ildoekin bat datozenak izango dira, beti ere esparru hauetan: arte garaikidea, arte biziak, zinema eta ikus-entzunezkoak, kultura digitalak, literatura eta gizartea.
