New York hirian bizi den Itziar Okarizen (Donostia, 1965) azken lanak ikus daitezke Bilboko Carreras Mugica galerian. Artista gipuzkoarrak zenbakietan oinarritutako 1,1,2,1… erakusketa paratu du eta apirilaren 27ra bitarte dago zabalik.
Okarizek izen bereko performancea egin zuen iragan urriaren 5ean Bilboko galeria horretan, eta egun ikus daitekeen erakusketak Ghost Box (Sala Rekalde, 2008) o How do you do (ARCO2010, Madril) proiektuekin loturiko lanak biltzen ditu, hala nola, performancearen marrazkiak, argazkiak edo bideoak. Lan horien bitartez, artistak galdetzen du ea zer den performancean bertan gelditzen dena eta zer gelditzen kanpoan. Zer dokumentatu edo komunikatu daitekeen eta zer ez.
Aipatu denez, 1,1,2,1… erakusketa izen bereko performancean oinarrituta dago. Izan ere, ekintza artistiko hartan bi lagun ikus-entzuleen aurrean jarri ziren, bakoitza alde banatan, eta itxuraz infinitua, baina eskuetako hatzaparrei mugatutako zenbaki simetrikoen segida errepikatu zuten behin eta berriz. Guy de Cointet artistaren marrazkietan ardaztutako performancea zen eta hizkuntza du aztergai zeinu eta esanahien eraikuntza konbinatorio infinitu gisa.
