SGAE Fundazioak euskal antzerkigintzaren erakustaldi bat antolatu du Bilbon. Ekainaren 8tik 10era hainbat antzezlan ikusteko aukera izango da Campos Eliseos Antzokiaren areto nagusian. Antzerkialdiaren helburua “Euskal Herrian egiten den antzerki-ekoizpen berrienari bultzada ematea da”.
El Chef, Erre Produkzioak taldearen eskutik (ekainak 8, 20:00etan); Etxeko Saltsak, Txalo Produkzioak (ekainak 9, 20:00etan); eta Euria, Markeliñe taldearena (ekainak 10, 19:00etan) izango dira oholtzaratuko diren lanak.
Ekainaren 8an, ostirala, Erre Produkzioak taldearen El Chef antzezlanak erakustaldia zabalduko du. David Caiñaren testuarekin, Gorka Minguezen zuzendaritzapean eta euskal aktore eta sortzaileak berak protagonizatua, El Chef “goi sukaldaritzaren ikastaro teatralizatua da, non frustrazioak, oroimenak eta akaso inoiz bete ez ziren desioak tartekatzen diren”.
Hurrengo egunean, ekainak 9, Txalo Produkzioak taldearen eskutik euskarazko antzezlana ikusteko abagunea izango da: Etxeko saltsak . Endredozko komedia bat da, korapilatsua. Ikusleek pertsonaiek baino informazio gehiago dute eta aktoreak gaizki-ulertuen etengabeko kate dibertigarrian dantzan daude. Bertan Aitziber Garmendia, Ane Gabarain, Miren Gojenola, Mikel Laskurain eta Aitor Fernandino aktoreak bilduko dira.
Antzerkialdiaren itxiera Markeliñe taldearen Euria lanaren eskutik etorriko da. Keinuzko antzerki hori, familia eta haurrentzako ikuskizuna da. Obrak FETEN Saria Ikuskizun onenari jaso zuen 2017an.
